സലാല : ഖരീഫ് സീസണിൽ ദോഫാർ സന്ദർശിക്കുന്നവർ സുരക്ഷ മാർഗനിർദേശങ്ങൾ പാലിക്കണമെന്ന് സിവിൽ ഡിഫൻസ് ആൻഡ് ആംബുലൻസ് അതോറിറ്റി (സി.ഡി.എ.എ) അറിയിച്ചു. ഈ കാലങ്ങളിൽ എത്തുന്ന സ്വദേശികൾക്കും വിദേശികൾക്കും സന്ദർശകർക്കും നൽകാനുള്ള സേവനങ്ങളെ കുറിച്ചും അധികൃതർ വ്യക്തമാക്കി.റോഡുകളിലെ അപകടം നേരിടാൻ പുതിയ കൺട്രോൾ പോയന്‍റുകളും സി.ഡി.എ ഒരുക്കി.വാഹനങ്ങൾ അറ്റകുറ്റപ്പണി നടത്തി പരിപാലിക്കുക, ഫസ്റ്റ് എയ്ഡ് ബാഗ് കരുതുക, പ്രവർത്തിക്കുന്ന അഗ്നിശമന ഉപകരണം തുടങ്ങിയ കാര്യങ്ങൾ ഉറപ്പാക്കണമെന്ന് അദ്ദേഹം അഭ്യർഥിച്ചു. സന്ദർശകർ തങ്ങളുടെ റൂട്ടിലെ വിശ്രമ മുറികളെയും സർവിസ് സ്റ്റേഷനുകളെയും കുറിച്ച് മുൻകൂട്ടി മനസ്സിലാക്കുന്നത് ഉചിതമായിരിക്കും. യാത്രക്കായി അനുയോജ്യമായ സമയം തിരഞ്ഞെടുക്കണം.ക്ഷീണം അനുഭവപ്പെടുകയാണെങ്കിൽ വിശ്രമിച്ചേ യാത്ര തുടരാവൂ. മുൻകരുതലുകളും മറ്റും ഒരുക്കാത്ത കുളങ്ങളിലും ബീച്ചുകളിലും നീന്തരുത്. ഖരീഫ് സീസണിൽ തിരമാലകൾ അനിയന്ത്രിതമായി ഉയർന്നേക്കാം.കുട്ടികളെ ശ്രദ്ധിക്കണമെന്നും സാധനങ്ങൾ വാങ്ങുമ്പോഴും മറ്റും വാഹനങ്ങളിൽ കുട്ടികളെ തനിച്ചാക്കരുതെന്നും അധികൃതർ രക്ഷിതാക്കളോട് ആവശ്യപ്പെട്ടു.
