ദമ്മാം : സംസ്ഥാന വനിതാ കമ്മീഷൻ അദ്ധ്യക്ഷ പദവിയിലിരുന്നുകൊണ്ട് പരാതിക്കാരായ സ്ത്രീകളോട് മനുഷ്യത്വപരമല്ലാത്ത സമീപനം സ്വീകരിച്ചിരുന്ന എം സി ജോസഫൈനോട് അദ്ധ്യക്ഷ സ്ഥാനത്തുനിന്നുള്ള രാജി ചോദിച്ചുവാങ്ങിയ സിപിഎം നടപടി ജനരോഷം ഭയന്നുള്ള തീരുമാനമാണെന്ന് ഒ ഐ സി സി ദമ്മാം റീജ്യണൽ കമ്മിറ്റി അഭിപ്രായപ്പെട്ടു. വനിതാ കമ്മീഷനിൽ പരാതിയുമായെത്തിയ തൊണ്ണൂറ് വയസ്സുള്ള വൃദ്ധയോടുപോലും അപമര്യാദയായി സംസാരിച്ച ജോസഫൈൻറെ ധിക്കാരപരമായ നടപടികളെ തിരുത്തുവാനോ നിയന്ത്രിക്കുവാനോ സി പി എമ്മോ മുഖ്യമന്ത്രിയോ തയ്യാറാകാത്തതിൻറെ അനന്തര ഫലമാണ് രാജിയിൽ കലാശിച്ചത്. കേരളത്തിലെ സ്ത്രീ സമൂഹത്തിന് വനിതാ കമ്മീഷനെക്കുറിച്ച് തെറ്റായ സന്ദേശമാണ് എം സി ജോസഫൈൻ തൻറെ പ്രവർത്തന ശൈലിയിലൂടെ നൽകിരുന്നത്.പാർട്ടി തീരുമാനങ്ങൾക്കനുസരിച്ച് പ്രവർത്തിക്കുന്ന സി പി എമ്മിൻറെ ഒരു പോഷക സംഘടനയെപ്പോലെ വനിതാ കമ്മീഷനെ അവർ മാറ്റുകയായിരുന്നുവെന്നുള്ളതി
സ്ത്രീധന ഗാർഹിക പീഢനങ്ങൾ വർദ്ധിച്ച് വരുന്ന കേരളത്തിൽ സ്ത്രീകൾക്ക് ആശ്വാസമേകേണ്ട വനിതാ കമ്മീഷൻ അദ്ധ്യക്ഷ പരാതിക്കാരായ സ്ത്രീകളെ മാനസികമായി പീഡിപ്പിക്കുന്ന സമീപനമാണ് സ്വീകരിച്ചത്. സി പി എമ്മിൻറെ ധാർഷ്ട്യവും ധിക്കാരവും നിറഞ്ഞ പൊതുസ്വഭാവമാണ് എം സി ജോസഫൈൻ തൻറെ സ്വഭാവ രീതിയിൽ പ്രകടിപ്പിച്ചിരുന്നത്. ഇത് ഒരിക്കലും വനിതാ കമ്മീഷൻ അദ്ധ്യക്ഷ സ്ഥാനത്തിരുന്ന ഒരു വ്യക്തിക്ക് ഭൂഷണമല്ല. മറ്റുള്ളവരുടെ ആവലാതികൾ സഹിഷ്ണുതയോടു കേട്ട് നീതിപൂർവ്വകമായ നിലപാട് സ്വീകരിച്ച് പരാതികളുമായി വരുന്ന സ്ത്രീകൾക്ക് ആശ്വാസവും സുരക്ഷിതത്വബോധവും നൽകുവാനാണ് വനിതാ കമ്മീഷൻ അദ്ധ്യക്ഷ പദവിയിലിരിക്കുന്നവർ മുൻകാലങ്ങളിൽ ചെയ്തിരുന്നത്. കവയിത്രി സുഗതമാകുമാരിയും ജസ്റ്റിസ് ശ്രീദേവിയും മുൻമന്ത്രി കമലവുമടക്കമുള്ളവർ നല്ല രീതിയിൽ കൈകാര്യം കൈകാര്യം ചെയ്തിരുന്ന വനിതാ കമ്മീഷൻറെ വിശ്വാസ്യതയെയാണ് എം സി
ജോസഫൈൻ തകർത്ത് കളഞ്ഞതെന്നും ഒ ഐ സി സി ദമ്മാം റീജ്യണൽ കമ്മിറ്റി പ്രസിഡണ്ട് ബിജു കല്ലുമലയും ജനറൽ സെക്രട്ടറി ഇ കെ സലിമും ചൂണ്ടിക്കാട്ടി.
തിരുവനന്തപുരത്ത് എം സി ജോസഫൈനെതിരെ സമാധാനപരമായി പ്രതിഷേധിച്ച മഹിളാ കോൺഗ്രസ്സ് നേതാക്കളെ അകാരണമായി അറസ്റ്റ് ചെയ്ത് നീക്കിയ നടപടിയിൽ ഒ ഐ സി സി ദമ്മാം റീജ്യണൽ കമ്മിറ്റി ശക്തമായ പ്രതിഷേധം രേഖപ്പെടുത്തുന്നതായും ഇരുനേതാക്കളും വ്യക്തമാക്കി. പ്രതിഷേധങ്ങളെ പോലീസിനെ ഉപയോഗിച്ച് അടിച്ചമർത്താമെന്നുള്ള സർക്കാരിൻറെ വ്യമോഹം നടക്കില്ല. എം സി ജോസഫൈൻ അദ്ധ്യക്ഷ പദവി രാജി വയ്ക്കുന്നതുവരെ വഴിയിൽ തടയുമെന്ന് മുന്നറിയിപ്പ് നൽകിയ കെ പി സി സി പ്രസിഡണ്ട് കെ സുധാകരൻറെ നിലപാടും വനിതാ കമ്മീഷൻ അദ്ധ്യക്ഷ പദവിയിൽ നിന്നും എം സി ജോസഫൈനോട് അടിയന്തിരമായി രാജി ചോദിച്ച് വാങ്ങാൻ ആക്കം കൂട്ടിയതായും ബിജു കല്ലുമലയും ഇ കെ സലിമും അവകാശപ്പെട്ടു.
