മസ്കറ്റ് : ഒമാനിൽ മലവെള്ളപ്പാച്ചിലിൽ വാഹനം അകപ്പെട്ടു രണ്ടു മലയാളികളെ കാണാതായി. കണ്ണൂർ സ്വദേശി വീജീഷ്, കൊല്ലം സ്വദേശി സുജിത് എന്നിവരെയാണ് കാണാതായത്. ഇബ്രിയിൽ പാലത്തിന് കുറുകെ ഒഴുകുന്ന മലവെള്ളപാച്ചിൽ (വാദി) മുറിച്ചു കടക്കാൻ ശ്രമിക്കവേ ഇവരുടെ വാഹനം ഒഴുക്കിൽ പെടുകയായിരുന്നു.ഞായറാഴ്ച വൈകുന്നേരം ഏഴു മണിയോടെയായിരുന്നു സംഭവം. പൊലീസ് നടത്തിയ തിരച്ചിലിൽ വാഹനം കണ്ടെത്തിയെങ്കിലും ആളെ കിട്ടിയില്ല. കനത്തമഴയും പെട്ടെന്നുണ്ടാകുന്ന വെള്ളപ്പൊക്കവും കാരണം തിരച്ചിൽ ദുഷ്കരമാണ്.ന്യൂനമർദത്തെ തുടർന്ന് വടക്കൻ ഗവർണറേറ്റുകളിൽ കനത്ത മഴയാണ് ഞായറാഴ്ച അനുഭവപ്പെട്ടത്. മഴയെ തുടർന്ന് ഇബ്രിയിലും പരിസരത്തും നിരവധി വാദികളാണ് രൂപപ്പെട്ടത്. പോലീസ് തിരച്ചിൽ ഊർജ്ജിതമാക്കിയിട്ടുണ്ട്.
