മസ്കറ്റ് : സലാലയിലെ ഏറ്റവും വലിയ ടൂറിസം മേളകളിൽ ഒന്നായ സലാല ടൂറിസം ഫെസ്റ്റിവൽ ഇൗ വർഷം ഉണ്ടായിരിക്കില്ല. കോവിഡ് വ്യാപനത്തെ പ്രതിരോധിക്കുന്നതിനുള്ള നടപടികളുടെ ഭാഗമായാണ് ഇൗ വർഷത്തെ ഫെസ്റ്റിവൽ റദ്ദാക്കാൻ ദോഫാർ നഗരസഭ തീരുമാനിച്ചത്. എല്ലാ വർഷവും ജൂലൈ മുതൽ ഒരു മാസം നടക്കുന്ന ഫെസ്റ്റിവലിൽ പങ്കെടുക്കാൻ ഒമാന്റെ വിവിധ ഭാഗങ്ങളിൽ നിന്നും മറ്റ് അറബ് രാജ്യങ്ങളിൽ നിന്നുമായി പതിനായിരങ്ങളാണ് സലാല അടങ്ങുന്ന ദോഫാർ ഗവർണറേറ്റിൽ എത്താറുള്ളത്. ജൂൺ അവസാനം മുതൽ ആഗസ്റ്റ് അവസാനം വരെയുള്ള ഖരീഫ് എന്നറിയപ്പെടുന്ന മഴക്കാലത്തിന്റെ ഭാഗമായാണ് ഫെസ്റ്റിവൽ നടക്കാറുള്ളത്. ഗൾഫ് മുഴുവനും ചുട്ടുപൊള്ളുമ്പോൾ സലാലയിൽ മൺസൂൺ മഴലഭിക്കുമെന്നതാണ് ഇവിടുത്തെ പ്രതേകത. കഴിഞ്ഞ വർഷം ഖരീഫ് മഴക്കാലം ആസ്വദിക്കാനും ടൂറിസം ഫെസ്റ്റിവലിൽ പങ്കെടുക്കാനുമായി ഏഴലക്ഷത്തിലധികം പേരാണ് സലാലയിൽ എത്തിയത്. സലാലയിലെ മലയാളികളടക്കം കച്ചവടക്കാർ ഏറെ പ്രതീക്ഷയോടെ കാത്തിരിക്കുന്ന സീസണാണ് ഖരീഫ് സീസൺ. ഈ സീസണിൽ കച്ചവടം ചെയ്യാൻ വേണ്ടിമാത്രം വരുന്ന നിരവധി മലയാളികളും ഇവിടെ ഉണ്ട് . ഹോട്ടലുകൾ, ഹോട്ടൽ അപ്പാർട്ട്മെന്റുകൾ തുടങ്ങി വിവിധ മേഖലകളിലെ ബിസിനസ് സ്ഥാപനങ്ങൾക്ക് ഒപ്പം കൃഷിതോട്ടങ്ങൾ പാട്ടത്തിന് എടുത്ത് നടത്തുന്നവരും എന്തുചെയ്യണമെന്നറിയാക്കതെ പകച്ചുനിൽക്കുകയാണ്.
