കുവൈറ്റ് കുവൈറ്റ് പെട്രോളിയം കോര്‍പ്പറേഷന്‍ (കെപിസി) ഹൈസ്‌കൂള്‍, യൂണിവേഴ്സിറ്റി ബിരുദധാരികള്‍ക്ക് ആകര്‍ഷകമായ ശമ്പളത്തില്‍ മികച്ച തൊഴിലവസരങ്ങള്‍ വാഗ്ദാനം ചെയ്യുന്നതായി അവകാശപ്പെടുന്ന റിക്രൂട്ട്മെന്റ് പരസ്യങ്ങള്‍ തട്ടിപ്പാണെന്ന് വെളിപ്പെടുത്തി കമ്പനി. കമ്പനിയിലെ പുതിയ തൊഴില്‍ അവസരങ്ങളുമായി ബന്ധപ്പെട്ട് സോഷ്യല്‍ മീഡിയയില്‍ അടുത്തിടെ പ്രചരിക്കുന്ന അഭ്യൂഹങ്ങള്‍ കമ്പനി അധികൃതര്‍ ശക്തമായി നിഷേധിച്ചു.
എക്സില്‍ പങ്കിട്ട ഒരു പ്രസ്താവനയില്‍ ഈ ക്ലെയിമുകളുടെ സാധുത കുവൈറ്റ് പെട്രോളിയം കോര്‍പ്പറേഷന്‍ വ്യക്തമായി നിഷേധിച്ചു. നിലവില്‍ കമ്പനി റിക്രൂട്ട്മെന്റ് നടത്തുന്നില്ല. ഇത്തരം വ്യാജ പരസ്യങ്ങളില്‍ വഞ്ചിതരായി തട്ടിപ്പുകള്‍ക്ക് ഇരകളാവാതിരിക്കാന്‍ എല്ലാവരും ജാഗ്രത പാലിക്കണമെന്നും അധികൃതര്‍ അറിയിച്ചു.
ഇത്തരം ലിങ്കുകള്‍ വ്യക്തികളുടെ രഹസ്യ വിവരങ്ങള്‍ ചോര്‍ത്തിയെടുക്കുന്നതിനായുള്ള വൈറസുകള്‍ അടങ്ങിയവ ആവാമെന്നും ഇത്തരം ലിങ്കുകളില്‍ ക്ലിക്ക് ചെയ്യുന്നതിന് മുമ്പ് പരസ്യത്തില്‍ പറയുന്ന കാര്യങ്ങള്‍ ശരിയാണോ എന്നും ഔദ്യോഗിക സ്രോതസ്സുകളില്‍ നിന്നുള്ളതാണ് ലിങ്കെന്നും ഉറപ്പുവരുത്തണമെന്നും അധികൃതര്‍ വ്യക്തമാക്കി. സ്ഥാപനങ്ങളുടെ ഔദ്യോഗിക വെബ്‌പേജെന്ന് തോന്നിപ്പിക്കുന്ന രീതിയിലും ഡിസൈനിലുമുള്ള ഇ-മെയില്‍ ഉള്ളടക്കങ്ങള്‍, സോഷ്യല്‍ മീഡിയ കണ്ടെന്റുകള്‍ എന്നിവ വഴിയാണ് ഇത്തരം തട്ടിപ്പ് ലിങ്കുകള്‍ വരുന്നത്. ഇവയില്‍ ക്ലിക്ക് ചെയ്യുന്നതു തന്നെ അപകടകരമാണെന്നും അവയില്‍ ആവശ്യപ്പെടുന്ന വ്യക്തിഗത വിവരങ്ങള്‍ നല്‍കാതിരിക്കാന്‍ ജാഗ്രത പാലിക്കണമെന്നും അധികൃതര്‍ അറിയിച്ചു.
