ബഹ്‌റൈൻ : കേരള സോഷ്യൽ ആന്‍റ് കൾച്ചറൽ അസോസിയേഷൻ ഫെബ്രുവരി 8ന്‌ ഇന്ത്യൻ സ്കൂൾ ഓഡിറ്റോറിയത്തിൽ വച്ച് വിപുലമായ പരിപാടികളോടെ
“ഹരിഹരലയം” എന്ന പേരിൽ മന്നം ജയന്തി ആഘോഷങ്ങള്‍ നടത്തുമെന്ന് അധികൃതർ അറിയിച്ചു . ഇസാ ടൌണ്‍ ഇന്ത്യന്‍ സ്കൂള്‍ ഓഡിറ്റോറിയത്തില്‍ വച്ചു
നടക്കുന്ന ചടങ്ങില്‍ രാജ്യസഭാംഗവും പ്രശസ്ത സിനിമാനടനുമായ ശ്രീ സുരേഷ്
ഗോപി മുഖ്യാതിഥിയായിരിക്കും. ഗാനരചയിതാവ് ശ്രീ എസ് രമേശന്‍ നായര്‍,
സിനിമാ നടന്‍ ശ്രീ ജഗദീഷ് എന്നിവര്‍ വിശിഷ്ടാതിഥികളായിരിക്കും.
ഇതോടനുബന്ധിച്ച് ഈ വര്‍ഷത്തെ മന്നം അവാർഡ് സമ്മാനിക്കുമെന്ന്
പ്രസിഡന്‍റ് പമ്പാവാസൻ നായർ പത്രസമ്മേളനത്തില്‍ അറിയിച്ചു.
സമൂഹത്തിന്‍റെ വിവിധ തലങ്ങളിൽ, അതായത് ശാസ്ത്രം, സാങ്കേതികം,
വിദ്യാഭ്യാസം, സാംസ്കാരികം, സാമൂഹികം, സാമ്പത്തികം, കല, സാഹിത്യം,
മാനുഷിക സേവനം തുടങ്ങി വിവിധ മേഖലകളില്‍ നിസ്വാർത്ഥ സേവനം
നടത്തുന്ന പ്രഗത്ഭരായ വ്യക്തികളേയും സ്ഥാപനങ്ങളേയും അവരുടെ
പ്രവർത്തനങ്ങളെ പ്രോത്സാഹിപ്പിക്കുന്നതിന്‍റെ ഭാഗമായി ആദരിക്കുവാന്‍
കേരള സോഷ്യൽ ആന്‍റ് കൾച്ചറൽ അസോസിയേഷൻ ഏർപ്പെടുത്തിയതാണ്‌
മന്നം അവാർഡ്. തുടര്‍ച്ചയായി ഇത് ആറാമത് തവണയാണ് ഈ അവാര്‍ഡ്
നല്‍കുന്നത്. മുന്‍വര്‍ഷങ്ങളില്‍ ഡോ. ഗോപാലകൃഷ്ണന്‍, പ്രോഫ. വി.എന്‍
രാജശേഖരന്‍ പിള്ള, ശ്രീ സുരേഷ് ഗോപി, ശ്രീ ബാലകൃഷ്ണപിള്ള, ശ്രീ
മന്മഥന്‍ നായര്‍ എന്നിവര്‍ക്കാണ് ഈ അവാര്‍ഡ് ലഭിച്ചിട്ടുള്ളത്.
പ്രശസ്ത കവിയും പണ്ഡിതനും ഗാനരചയിതാവുമായ ശ്രീ എസ്. രമേശന്‍
നായര്‍ക്ക് ഈ വര്‍ഷത്തെ മന്നം അവാര്‍ഡ് നല്‍കാന്‍ തീരുമാനിച്ചതായി
അവാര്‍ഡ് കമ്മിറ്റി ചെയര്‍മാന്‍ അനിൽ കുമാർ അറിയിച്ചു. ശ്രീ എസ്.
രമേശന്‍ നായര്‍ 160-ൽ പരം സിനിമകള്‍ക്കായി 700-ൽ പരം ഗാനങ്ങളും
2000ലധികം ഭക്തിഗാനങ്ങളും രചിച്ചിട്ടുണ്ട്. 1985-ല്‍ പുറത്തിറങ്ങിയ
പത്താമുദയം എന്ന ചലച്ചിത്രത്തിലെ ഗാനങ്ങള്‍ രചിച്ചുകൊണ്ടാണ്
മലയാളചലച്ചിത്ര രംഗത്ത് പ്രവേശിക്കുന്നത്. നിരവധി പദ്യങ്ങള്‍,
കവിതാസമാഹാരങ്ങള്‍, നാടകങ്ങള്‍, ബാലസാഹിത്യങ്ങള്‍, ആമുഖങ്ങള്‍,
ഉപന്യാസങ്ങള്‍, സീരിയലുകള്‍ എന്നിവ മലയാള സാഹിത്യ ലോകത്തിന്
സംഭാവന ചെയ്തിട്ടുണ്ട്. ശ്രീനാരായണ ഗുരുവിന്‍റെ ജീവിതവും ദർശനവും
വിവരിക്കുന്ന ‘ഗുരുപൗർണമി’ എന്ന പുസ്തകത്തിന് 2018ലെ കേന്ദ്ര സാഹിത്യ
അക്കാഡമി അവാര്‍ഡ് നേടിയ വ്യക്തിയാണ്. 2010ലെ കേരളസാഹിത്യ
അക്കാദമിയുടെ സമഗ്രസംഭാവനയ്ക്കുള്ള പുരസ്കാരം നേടിയിട്ടുണ്ട്. ആശാൻ
പുരസ്കാരം, ഓടക്കുഴൽ അവാർഡ്, ഇടശ്ശേരി അവാർഡ്, വെണ്ണിക്കുളം
അവാർഡ്, ഫിലിം ക്രിട്ടിക്സ് അവാർഡ്, നാടകഗാനരചനയ്ക്കുള്ള സംസ്ഥാന
അവാർഡ് എന്നിങ്ങനെ അന്‍പതോളം ബഹുമതികള്‍ക്ക് അദ്ദേഹം
അര്‍ഹനായിട്ടുണ്ട്. തിരുക്കുറല്‍, ചിലപ്പതികാരം എന്നീ ഗ്രന്ഥങ്ങള്‍
വിവര്‍ത്തനം ചെയ്തതിന് തമിഴ്നാട്‌ ഗവണ്മെന്റിന്‍റെ ആദരവ് നേടിയ
വ്യക്തിയാണ്. സുബ്രഹ്മണ്യഭാരതിയുടെ കവിതകള്‍ തമിഴില്‍ നിന്ന്
മലയാളത്തിലേയ്ക്ക് മൊഴിമാറ്റം ചെയ്തിട്ടുണ്ട്. കേരള ഭാഷാ ഇന്‍സ്റ്റിറ്റ്യൂട്ടില്‍
സബ് എഡിറ്ററായും ആകാശവാണിയില്‍ നിര്‍മ്മാതാവായും പ്രവര്‍ത്തിച്ചിട്ടുണ്ട്.
സംഘപരിവാർ സാംസ്കാരിക സംഘടനയായ തപസ്യ കലാസാഹിത്യ
വേദിയുടെ സംസ്ഥാന പ്രസിഡന്റാണ് അദ്ദേഹം.
അനിൽ കുമാർ ചെയർമാനും ദേവദാസ് നമ്പ്യാർ, പ്രവീൺ നായർ,
ശിവകുമാർ, അജയ് പി നായർ എന്നിവരടങ്ങുന്ന അഞ്ചംഗകമ്മിറ്റിയാണ് ഈ
വര്‍ഷത്തെ മന്നം അവാര്‍ഡ് ജേതാവിനെ തെരഞ്ഞെടുത്തത്.
ചടങ്ങിൽ സിനിമാരംഗത്തെ സമഗ്ര സംഭാവനക്കുള്ള സ്റ്റാര്‍ ഐക്കണ്‍ പുരസ്കാരം
പ്രശസ്ത സിനിമാനടൻ ശ്രീ ജഗദീഷിന് സമ്മാനിക്കും. സ്കൂള്‍
വിദ്യാര്‍ത്ഥിയായിരിക്കുമ്പോള്‍ തന്നെ കലാരംഗത്ത് കഴിവ് തെളിയിച്ചു. ബാങ്ക്
ഉദ്യോഗസ്ഥനായി ഔദ്യോഗിക ജീവിതം ആരംഭിച്ച ശ്രീ ജഗദീഷ് പിന്നീട്
അദ്ധ്യാപന രംഗത്തെത്തി. 1984ല്‍ “മൈ ഡിയര്‍ കുട്ടിച്ചാത്തന്‍” എന്ന
മലയാളത്തിലെ ആദ്യ 3D സിനിമയിലൂടെ സിനിമാരംഗത്ത് പ്രവേശിച്ച അദ്ദേഹം
നാനൂറോളം സിനിമകളില്‍ ഹാസ്യനടനായും സഹനടനായും
നായകനായുമൊക്കെ അഭിനയിച്ചിട്ടുണ്ട്. അഭിനേതാവ് എന്നതിലുപരി
ഛയാഗ്രാഹകനും, എഴുത്തുകാരനും ഗായകനും പ്രാസംഗികനുമാണ് ഈ
ബഹുമുഖ പ്രതിഭ. അഭിനയത്തോടൊപ്പം കഥ, തിരക്കഥ, സംഭാഷണം എന്നീ
രംഗങ്ങളിലും കഴിവു തെളിയിച്ച അപൂര്‍വ്വം നടന്മാരിലൊരാളാണ് അദ്ദേഹം.
നിരവധി സിനിമകള്‍ക്ക് തിരക്കഥ രചിച്ചിട്ടുണ്ട്. സിനിമക്ക് പുറമെ
ടെലിവിഷന്‍ രംഗത്തും അനായാസമായ അവതരണ ശൈലി കൊണ്ട്
അവിഭാജ്യ ഘടകമായ അദ്ദേഹം നിരവധി ടെലിവിഷന്‍ പരിപാടികളില്‍
അവതാരകനായും വിധികര്‍ത്താവായും തിളങ്ങിയിട്ടുണ്ട്.
കൂടാതെ വ്യവസായ പ്രമുഖർക്കായി ഏർപ്പെടുത്തിയ ഈ വര്‍ഷത്തെ പ്രവാസി രത്ന
പുരസ്കാരവും ചടങ്ങിൽ നൽകും , സംഘടനയുടെ മെമ്പര്‍ഷിപ്പ് ഡയറക്ടറി പ്രകാശനം
ചടങ്ങിൽ നടക്കും . അംഗങ്ങള്‍ക്ക് പരസ്പരം
ബന്ധപ്പെടാന്‍ ഉതകുന്ന രീതിയില്‍ നവീന സംവിധാനങ്ങളോടു കൂടിയ ഒരു ഇ-
ഡയറക്ടറി കൂടി ഇതിന്‍റെ ഭാഗമായി ഉണ്ടായിരിക്കുമെന്ന്‍ ഡയറക്ടറി
ജനറല്‍ കണ്‍വീനര്‍ ഹരിദാസ് ബി നായര്‍ അറിയിച്ചു.
തുടർന്ന് പ്രശസ്ത പിന്നണി ഗായകരായ ശ്രീനാഥ്, ജാനകി നായർ എന്നിവർ
അവതരിപ്പിക്കുന്ന സംഗീത നിശയും കോമഡി ആർട്ടിസ്റ്റ് സുനീഷ് വാരനാട്
അവതരിപ്പിക്കുന്ന കോമഡി ഷോയും മറ്റ് കലാപരിപാടികളും
ഉണ്ടായിരിക്കും. ജനറൽ കണ്‍വീനര്‍ പ്രവീണ്‍ നായര്‍, ജനറല്‍ കോര്‍ഡിനേറ്റര്‍
ജ്യോതി മേനോന്‍, എക്സിക്യൂട്ടിവ് കമ്മിറ്റി അംഗങ്ങള്‍ എന്നിവര്‍
പരിപാടിക്ക് നേതൃത്വം നല്‍കും.
പമ്പാവാസന്‍ നായര്‍, സന്തോഷ്‌ കുമാര്‍, ജയകുമാര്‍, പ്രവീണ്‍ നായര്‍, അനില്‍
കുമാര്‍, ഹരിദാസ് നായര്‍, അജയകുമാര്‍, അഭിലാഷ് പിള്ള, ജ്യോതി മേനോന്‍,
ജയന്‍ എസ് നായര്‍ എന്നിവര്‍ പത്രസമ്മേളനത്തില്‍ പങ്കെടുത്തു.
