സൗദി : റിപ്പബ്ലിക് ദിനാഘോഷത്തിനുബന്ധിച്ച് സൗദി അറേബ്യയിലെ നിയുക്ത ഇന്ത്യൻ അംബാസഡർ ഡോ. സുഹൈൽ അജാസ് ഖാൻ ഈ മാസം 15ന് റിയാദിലെത്തി ഔദ്യോഗിക ചുമതലയേൽക്കും.കൂടാതെ ഈ മാസം 15 മുതൽ 17 വരെ നിശ്ചയിച്ചിരിക്കുന്ന ഇന്ത്യൻ വിദേശകാര്യ സഹമന്ത്രി വി. മുരളീധരന്റെ സൗദി സന്ദർശന പരിപാടിക്കും നേതൃത്വം നൽകും. കഴിഞ്ഞ വർഷം മാർച്ചിൽ ഡോ. ഔസാഫ് സഈദ് കിഴക്കൻ മേഖല സെക്രട്ടറിയായി സ്ഥാനകയറ്റം ലഭിച്ച് വിദേശകാര്യ മന്ത്രാലയ ആസ്ഥാനത്തേക്ക് മാറിയ ശേഷം റിയാദിൽ അംബാസഡറുണ്ടായിരുന്നില്ല. ആ ഒഴിവിലേക്കാണ് 1997 ബാച്ച് ഐ.എഫ്.എസ് ഉദ്യോഗസ്ഥനായ ഡോ. സുഹൈൽ അജാസ് ഖാൻ നിയമിച്ചിരിക്കുന്നത് . ലബനോണിലെ അംബാസഡർ പദവിയിൽനിന്നാണ് റിയാദിലേക്കുള്ള മാറ്റം അദ്ദേഹത്തിന്റെ സൗദിയിലെ മൂന്നാം ഊഴമാണിത്. ജിദ്ദയിൽ കോൺസൽ ജനറലായും റിയാദിൽ ഡെപ്യൂട്ടി ചീഫ് ഓഫ് മിഷൻ (ഡി.സി.എം) ആയുംഅദ്ദേഹം പ്രവർത്തനമനുഷ്ഠിച്ചിരുന്നു .എംബസിയിൽ നടക്കുന്ന റിപ്പബ്ലിക് ദിനാഘോഷ പരിപാടിയിൽ ദേശീയ പതാക ഉയർത്തുന്ന അംബാസഡർ പ്രവാസി സമൂഹത്തെ അഭിസംബോധന ചെയ്യും. സ്വതന്ത്ര ഇന്ത്യയുടെ 76-ാം വാർഷികാഘോഷമായ ‘ആസാദി കാ അമൃത് മഹോത്സവ’ത്തിന്റെയും ഇന്ത്യ – സൗദി നയതന്ത്രബന്ധത്തിന്റെ 76-ാം വാർഷികാഘോഷത്തിന്റെയും കൂടി പശ്ചാത്തലത്തിൽ, 1950ൽ ഇന്ത്യ പരമാധികാര റിപ്പബ്ലിക്കായി മാറിയതിന്റെ വാർഷിക ദിനത്തിൽ റിയാദിലെ ഇന്ത്യൻ എംബസിയിൽ വിപുലമായ ആഘോഷ പരിപാടികളാണ് ഒരുക്കുന്നത്. അനുബന്ധമായി 28ന് വിവിധ രാജ്യങ്ങളുടെ നയതന്ത്ര പ്രതിനിധികൾക്കും സൗദി ഉന്നത വ്യക്തിത്വങ്ങൾക്കും ക്ഷണിക്കപ്പെട്ട സാമൂഹിക പ്രതിനിധികൾക്കുമായി ഒരുക്കുന്ന അത്താഴ വിരുന്നിലും അംബാസഡർ പങ്കെടുക്കും. ഔദ്യോഗിക സന്ദർശനത്തിന് ഈ മാസം 15നാണ് കേന്ദ്രമന്ത്രി വി. മുരളീധരൻ സൗദിയിലെത്തിച്ചേരുന്നത് .
