മസ്കറ്റ്: ഒമാനിൽ ചൊവ്വാഴ്ച 1389 പേർക്ക് കൂടി കോവിഡ് സ്ഥിരീകരിച്ചു. ഇതോടെ രാജ്യത്തെ മൊത്തം രോഗബാധിതർ 59568 ആയി. 4044 പരിശോധനകളാണ് നടത്തിയത്. പുതിയ രോഗികളിൽ 1050 പേർ സ്വദേശികളും 339 പേർ പ്രവാസികളുമാണ്. 730 പേർക്ക് കൂടി രോഗം ഭേദമായി. ഇതോടെ മൊത്തം രോഗമുക്തരുടെ എണ്ണം 37987 ആയി. 14 പേർ കഴിഞ്ഞ 24 മണിക്കൂറിനുള്ളിൽ മരണപ്പെടുകയും ചെയ്തു. ഇതാദ്യമായാണ് ഇത്രയധികം പേർ ഒരു ദിവസം മരണപ്പെടുന്നത്. ഇതോടെ മരണ സംഖ്യ 273 ആയി. ഇതുവരെ മരണപ്പെട്ടതിൽ 138 പേർ സ്വദേശികളും 135 പേർ പ്രവാസികളുമാണ്. 79 പേരെ കൂടി ആശുപത്രിയിൽ പ്രവേശിപ്പിച്ചു. 514 പേരാണ് ഇപ്പോൾ ആശുപത്രികളിൽ ചികിത്സയിലുള്ളത്. ഇതിൽ 149 പേർ തീവ്ര പരിചരണ വിഭാഗത്തിലാണുള്ളത്.21308 പേർ നിലവിൽ അസുഖബാധിതരാണ്.പുതിയ രോഗികളുടെ എണ്ണത്തിൽ ഇന്ന് മസ്കത്തിനെ പിന്തള്ളി വടക്കൻ ബാത്തിന മുന്നിലെത്തി. 419 പേർക്കാണ് വടക്കൻ ബാത്തിനയിൽ രോഗം സ്ഥിരീകരിച്ചത്. മസ്കത്തിൽ 405 പുതിയ രോഗികളാണ് ഉള്ളത്. ഇതോടെ വടക്കൻ ബാത്തിനയിലെ മൊത്തം രോഗികളുടെ എണ്ണം 7949ഉം മസ്കത്തിലേത് 34044ഉം ആയി. വിലായത്ത് തലത്തിലെ കണക്കുകൾ പരിശോധിക്കുമ്പോൾ സീബിൽ തന്നെയാണ് ഇന്നും കൂടുതൽ രോഗികൾ. 196 പുതിയ കേസുകളാണ് ഇവിടെ റിപ്പോർട്ട് ചെയ്തത്. സുഹാറിൽ 153ഉം ബോഷറിൽ 107ഉം ബർക്കയിൽ 103ഉം പുതിയ രോഗികൾ ഉണ്ട്.മരണപ്പെട്ടതിൽ 162 പേരും മസ്കത്തിൽ ചികിത്സയിലിരുന്നവരാണ്.
