ദുബായ്: ഗോള്‍ഡന്‍ വിസ സ്വന്തമാക്കാന്‍ മികച്ച പ്രൊഫഷനലുകള്‍ക്കും അവസരം. എമിറേറ്റുകളില്‍ ദീര്‍ഘകാല താമസിക്കാനും നികുതി രഹിത വരുമാനം സ്വന്തമാക്കാനും യുഎഇ വാഗ്ദാനം ചെയ്യുന്ന ലോകോത്തര ജീവിത നിലവാരം ആസ്വദിക്കാനുമുള്ള മികച്ച അവസരമാണ് ഗോള്‍ഡന്‍ വിസ. ഒന്നിലധികം എന്‍ട്രി പെര്‍മിറ്റുകള്‍, ദീര്‍ഘകാല താമസം, ആശ്രിതരെ സ്‌പോണ്‍സര്‍ ചെയ്യാനുള്ള അനുവാദം എന്നിവ ഉള്‍പ്പെടെ നിരവധി ആനുകൂല്യങ്ങള്‍ ഗോള്‍ഡന്‍ വിസ നൽകുന്നത്. വിദഗ്ധരായ തൊഴിലാളികളും പ്രൊഫഷണലുകളും നിര്‍ദ്ദിഷ്ട മാനദണ്ഡങ്ങള്‍ പാലിക്കുന്നുണ്ടെങ്കില്‍ അവര്‍ക്ക് ഗോള്‍ഡന്‍ വിസയ്ക്ക് അര്‍ഹതയുണ്ട് യുഎഇ അധികൃതര്‍ അറിയിച്ചു. ഹ്യൂമന്‍ റിസോഴ്സസ് ആന്‍ഡ് എമിറേറ്റൈസേഷന്‍ മന്ത്രാലയത്തിന്റെ വര്‍ഗീകരണം അനുസരിച്ച് ഒന്നും രണ്ടും കാറ്റഗറി ജോലികള്‍ ചെയ്യുന്ന പ്രൊഫഷനലുകള്‍ക്കാണ് ഇതിനുള്ള അവസരമുള്ളത്. യുഎഇയില്‍ സാധുതയുള്ള തൊഴില്‍ കരാര്‍ കൈവശമുണ്ടായിരിക്കുകയും ഒരു ബാച്ചിലേഴ്‌സ് ഡിഗ്രി സ്വന്തമാക്കിയ വ്യക്തിയുമായിരിക്കുണം. അതിനു പുറമെ, കുറഞ്ഞത് 30,000 ദിര്‍ഹത്തിന്റെ പ്രതിമാസ ശമ്പളവും വേണം. ഇതുപ്രകാരം മാനേജര്‍മാര്‍, ബിസിനസ് എക്‌സിക്യൂട്ടീവുകള്‍, ശാസ്ത്രം, എഞ്ചിനീയറിംഗ്, ആരോഗ്യം, വിദ്യാഭ്യാസം, ബിസിനസ്, മാനേജ്‌മെന്റ്, ഇന്‍ഫര്‍മേഷന്‍ ടെക്‌നോളജി, നിയമം, സോഷ്യോളജി, കള്‍ച്ചര്‍ എന്നീ മേഖലകളിലെ പ്രൊഫഷണലുകള്‍ ഇവര്‍ക്കെല്ലാം ഗോള്‍ഡന്‍ വിസയ്ക്ക് അര്‍ഹതയുണ്ടായിരിക്കും.
ഗോള്‍ഡന്‍ വിസയ്ക്ക് അപേക്ഷിക്കുന്നതിന് കഴിഞ്ഞ ആറ് മാസത്തെ ബാങ്ക് സ്റ്റേറ്റ്മെന്റുകള്‍ ആവശ്യമാണ്. യൂണിവേഴ്സിറ്റി ബിരുദ സര്‍ട്ടിഫിക്കറ്റിന്റെ സാക്ഷ്യപ്പെടുത്തിയ പകര്‍പ്പും അപേക്ഷയോടൊപ്പം സമര്‍പ്പിക്കണം. വിദേശ സര്‍വകലാശാസയുടെ ബിരുദമാണെങ്കില്‍ അത് അപേക്ഷകന്റെ നാട്ടിലെ യുഎഇ എംബസിയും യുഎഇയിലെ വിദേശകാര്യ മന്ത്രാലയവും സാക്ഷ്യപ്പെടുത്തിയിരിക്കണം. ഗോള്‍ഡന്‍ റെസിഡന്‍സി സ്വന്തമാക്കാന്‍ ജീവനക്കാരന് അനുവാദം നല്‍കുന്ന ഒരു നിരാക്ഷേപ പത്രം (എന്‍ഒസി) കമ്പനിയുടെ ഭാഗത്തു നിന്ന് ലഭിക്കണം. കമ്പനിയുടെ ഔദ്യോഗിക ലെറ്റര്‍ ഹെഡില്‍ എച്ച്ആര്‍ മാനേജരോ സമാന തസ്തികയിലുള്ളവരോ അതില്‍ ഒപ്പുവയ്ക്കുകയും കമ്പനിയുടെ സ്റ്റാമ്പ് പതിക്കുകയും വേണം.
ഒരു പ്രവാസി ഒരു മെയിന്‍ലാന്‍ഡ് കമ്പനിയില്‍ ജോലി ചെയ്യുകയാണെങ്കില്‍ തൊഴില്‍ മന്ത്രാലയവുമായുള്ള കരാര്‍ ആവശ്യമാണ്. തൊഴില്‍ കരാറില്‍ മൊത്തം ശമ്പളം 30,000 ദിര്‍ഹമോ അതില്‍ കൂടുതലോ കാണിക്കണം. ഒരു ഫ്രീ സോണ്‍ കമ്പനിയില്‍ ജോലി ചെയ്യുന്നവര്‍ക്ക്, 30,000 ദിര്‍ഹമോ അതില്‍ കൂടുതലോ ശമ്പളം സ്ഥിരീകരിക്കുന്ന, ബന്ധപ്പെട്ട ഫ്രീ സോണ്‍ അതോറിറ്റി നല്‍കുന്ന ശമ്പള സര്‍ട്ടിഫിക്കറ്റ് ആവശ്യമാണ്. നിര്‍ദ്ദിഷ്ട മന്ത്രാലയങ്ങളില്‍ നിന്നുള്ള ഗോള്‍ഡന്‍ വിസ നോമിനേഷന്‍ കത്താണ് മറ്റൊരു പ്രധാന ആവശ്യം. ഗോള്‍ഡന്‍ വിസ പ്രോഗ്രാമിനുള്ള അപേക്ഷകന്റെ യോഗ്യതകള്‍ എടുത്തുകാണിച്ചുകൊണ്ടുള്ളതായിരിക്കും ഈ കത്ത്. ഒരു ഗോള്‍ഡന്‍ റെസിഡന്‍സിക്ക് അപേക്ഷിക്കുമ്പോള്‍ അപേക്ഷകനും കുടുംബാംഗങ്ങള്‍ക്കും സമഗ്രമായ ആരോഗ്യ ഇന്‍ഷുറന്‍സ് ഉണ്ടായിരിക്കണം. അതോടൊപ്പം വിസ പേജും ഒരു വ്യക്തിഗത പാസ്പോര്‍ട്ട് സൈസ് ഫോട്ടോയും സഹിതമുള്ള പാസ്പോര്‍ട്ട് ഉദ്യോഗാര്‍ത്ഥി നല്‍കണം.
ദുബായ് വിസയുള്ളവര്‍ ജനറല്‍ ഡയറക്ടറേറ്റ് ഓഫ് റെസിഡന്‍സി ആന്‍ഡ് ഫോറിനേഴ്‌സ് അഫയേഴ്‌സിന്റെ സ്മാര്‍ട്ട് ആപ്ലിക്കേഷനോ ഔദ്യോഗിക വെബ് പോര്‍ട്ടലോ (https://www.gdrfad.gov.ae) ഉപയോഗിക്കാം. ജിഡിആര്‍എഫ്എ അംഗീകൃത ടൈപ്പിംഗ് സെന്ററുകളോ വിസ പ്രോസസ്സിംഗ് സെന്ററുകളോ സന്ദര്‍ശിക്കുകയാണെങ്കില്‍ ആവശ്യമായ ഫോമുകള്‍ പൂരിപ്പിക്കുന്നതിനും എല്ലാ രേഖകളും ശരിയായി സമര്‍പ്പിച്ചിട്ടുണ്ടെന്ന് ഉറപ്പുവരുത്തുന്നതിനും ജീവനക്കാര്‍ക്ക് സഹായിക്കാനാകും. മറ്റ് എമിറേറ്റുകളില്‍ താമസിക്കുന്നവര്‍ക്ക്, അപേക്ഷാ പ്രക്രിയയില്‍ ചെറിയ വ്യത്യാസമുണ്ട്. അവര്‍ ഫെഡറല്‍ അതോറിറ്റി ഫോര്‍ ഐഡന്റിറ്റി, സിറ്റിസണ്‍ഷിപ്പ്, കസ്റ്റംസ് & പോര്‍ട്ട് സെക്യൂരിറ്റി (ഐസിപി) വഴി അപേക്ഷിക്കണം. ഒന്നുകില്‍ ഐസിപിയുടെ ഓണ്‍ലൈന്‍ സേവനങ്ങള്‍ ആക്സസ് ചെയ്യാം അല്ലെങ്കില്‍ വ്യക്തിഗത സഹായത്തിനായി അംഗീകൃത ടൈപ്പിംഗ് സെന്ററിനെ സമീപിക്കാം.സംസ്‌കാരിക, കലാ മേഖലകളില്‍ പ്രവര്‍ത്തിക്കുന്ന പ്രൊഫഷനലുകള്‍ ദുബായ് കള്‍ച്ചര്‍ അതോറിറ്റിയില്‍ നിന്നോ സാംസ്‌കാരിക മന്ത്രാലയത്തില്‍ നിന്നോ ആണ് നോമിനേഷന്‍ കത്ത് വാങ്ങേണ്ടത്. പുതിയ കണ്ടുപിടുത്തങ്ങള്‍ നടത്തിയ പ്രതിഭകള്‍ സാമ്പത്തിക മന്ത്രാലയത്തില്‍ നിന്നോ യോഗ്യതയുള്ള പ്രാദേശിക അതോറിറ്റിയില്‍ നിന്നോ നോമിനേഷന്‍ കത്ത് വാങ്ങണം. അത്ലറ്റുകള്‍ ജനറല്‍ സ്പോര്‍ട്സ് അതോറിറ്റി, ദുബായ് സ്പോര്‍ട്സ് കൗണ്‍സില്‍ എന്നിവയില്‍ നിന്നോ ഡിജിറ്റല്‍ പ്രതിഭകള്‍ എമിറേറ്റ്സ് കൗണ്‍സില്‍ ഫോര്‍ ആര്‍ട്ടിഫിഷ്യല്‍ ഇന്റലിജന്‍സില്‍ നിന്നും മറ്റ് മേഖലകളിലെ അസാധാരണ പ്രതിഭകള്‍ ദുബായ് ഫ്യൂച്ചര്‍ അതോറിറ്റിയില്‍ നിന്നും നോമിനേഷന്‍ വാങ്ങണം. നോമിനേഷന്‍ ലഭിച്ചതിന് ശേഷമാണ് ഗോള്‍ഡന്‍ വിസയ്ക്ക് അപേക്ഷിക്കേണ്ടത്.
