മനാമ: ശ്രീനാരായണ കൾച്ചറൽ സൊസൈറ്റിയിൽ കുമാരനാശാൻ വായനശാല, സാഹിത്യവേദി ഉപവിഭാഗങ്ങളുടെ പ്രവർത്തനോദ്ഘാടനവും 47-മത് വയലാർ അനുസ്മരണവും കഴിഞ്ഞ ദിവസം വൈകിട്ട് SNCS സിൽവർ ജൂബിലി ഹാളിൽ പ്രൗഢഗംഭീരമായി നടന്നു.
ലൈബ്രറി, സാഹിത്യ വേദി സബ് കമ്മിറ്റികളുടെ ഉദ്ഘാടനം ബഹറിനിലെ യുവ സാഹിത്യകാരനും, വൈക്കം മുഹമ്മദ് ബഷീർ സാഹിത്യ പുരസ്കാര ജേതാവുമായ ശ്രീ. നാസർ മുതുകാട് നിർവഹിച്ചു. സാഹിത്യ രചനകളുടെ ബാലപാഠം വിശദീകരിച്ചുകൊണ്ടുള്ള ഉദ്ഘാടകന്റെ പ്രസംഗം വളരെ അർത്ഥവത്തായിരുന്നു.
ചടങ്ങിൽ എസ് എൻ സി എസ് മെമ്പർഷിപ്പ് സെക്രട്ടറി ശ്രീ. ഷൈൻ ചെല്ലപ്പൻ സ്വാഗതവും ലൈബ്രേറിയൻ ശ്രീ. ജയേഷ്. വി. കെ. അധ്യക്ഷതയും വഹിച്ചു.
തുടർന്ന് വയലാർ അനുസ്മരണം, മുൻ ജനറൽ സെക്രട്ടറി ശ്രീ. രാജേഷ് ദിവാകരൻ, സദസ്സിനെ കയ്യിലെടുത്ത്, വയലാർ കൃതികളെയും ജീവിതാനുഭവങ്ങളെയും കോർത്തിണക്കി അവതരിപ്പിച്ചു. ചെയർമാൻ ശ്രീ. സുനീഷ് സുശീലൻ, ജനറൽ സെക്രട്ടറി ശ്രീ. വി. ആർ. സജീവൻ തുടങ്ങിയവർ ആശംസകൾ അർപ്പിച്ചു സംസാരിച്ചു. തുടർന്ന് അംഗങ്ങൾ അവതരിപ്പിച്ച വയലാർ കവിതകൾ, സിനിമ ഗാനങ്ങൾ തുടങ്ങിയവയും അരങ്ങേറി.
ശ്രീമതി സുജി അജിത് അവതാരകയായ ചടങ്ങിൽ സാഹിത്യവേദി കൺവീനർ ശ്രീ. പ്രശാന്തൻ ബി. പുതിയ സബ് കമ്മിറ്റി അംഗങ്ങളെ സദസ്സിനു പരിചയപ്പെടുത്തുകയും നന്ദി രേഖപ്പെടുത്തുകയും ചെയ്തു.
