സോഹാർ: സോഹാർ നവചേതനയുടെ ആഭിമുഖ്യത്തിൽ ഓണോത്സവം 2023 എന്ന പേരിൽ ഓണാഘോഷവും ഒമാനിലെ ഒരുകൂട്ടം കലാകാരന്മാർ ഒരുക്കിയ ‘സമൂസ ‘എന്ന ഹ്രസ്വ സിനിമ റിലീസിങ്ങും ഒക്ടോബർ 6 വെള്ളിയാഴ്ച സോഹാറിലെ അംബാറിലുള്ള വുമൺസ് അസോസിയേഷൻ ഹാളിൽ വെച്ച് നടത്തപ്പെടുന്നു.ഓണോത്സവത്തിൽ മുഖ്യ അതിഥി ആയി സിനിമ സീരിയൽ താരവും കേരള ഫിലിം ക്രിറ്റിക് അവാർഡ് ജേതാവുമായ സ്വപ്ന ട്രീസ കൂടാതെ മേക്കപ്പ് ആർട്ടിസ്റ്റും ഹെയർ സ്റ്റൈലിസ്റ്റുമായ അമല ബ്രഹ്മാനന്ദൻ എഴുത്തുകാരൻ കെ. ആർ. പി വള്ളികുന്നം എന്നിവർ പങ്കെടുക്കുന്നു.വൈകീട്ട് 5.30 ന് പരിപാടി ആരംഭിക്കും.ഓണകളികളും വൈവിധ്യമാർന്ന വിവിധ കലാപരിപാടികളും വ്യത്യസ്ഥ മത്സരങ്ങളും അരങ്ങേറുമെന്ന് നവചേതന ഭാരവാഹികൾ പറഞ്ഞു.തുടർന്ന് R4U മീഡിയ ബാനറിൽ അന്നാസ് പ്രൊഡക്ഷൻ നിർമ്മിച്ച സമൂസ എന്ന ഹ്രസ്വ സിനിമയുടെ റിലീസ് പ്രദർശനവും നടക്കും.റിയാസ് വലിയകത്ത്‌ ക്യാമറയും സംവിധാനവും നിർവഹിച്ച സമൂസ യുടെ കഥയും തിരക്കഥയും മാധ്യമപ്രവർത്തകൻ റഫീഖ് പറമ്പത്ത് നിർവഹിക്കുന്നു.പ്രവാസ ലോകത്ത് ജീവിതം കരുപിടിപ്പിക്കാൻ ഓടുന്ന ഒരാൾക്ക് നേരിടേണ്ടിവരുന്ന പ്രയാസങ്ങൾ പറയുകയാണ് സമൂസ എന്ന കൊച്ചു സിനിമ എന്ന് സംവിധായകൻ പറഞ്ഞു.പ്രവേശനം സൗജന്യമായിരിക്കും
