ബഹ്‌റൈൻ : ആക്ഷൻ കിംഗ്‌ ബാബു ആന്റണിയോടൊപ്പം മകൻ ആർതർ ആന്റണിയും ഫിലിം ഇൻഡസ്ട്രിയുടെ ഭാഗമാകുന്നു.മുൻപ് ഇടുക്കി ഗോൾഡ് എന്ന ചിത്രത്തിലൂടെ ആർതർ സിനിമയുടെ ആദ്യ ചുവടുവെപ്പ് നടത്തിയിരുന്നു.മലയാളിയായ സന്ദീപ്‌ ജയൻ സംവിധാനം ചെയ്യുന്ന ചിത്രത്തിൽ ആണ് വീണ്ടും ആർതർ ആന്റണി അഭിനയിക്കുന്നത് .
മിക്സഡ്‌ മാർഷ്യൽ ആർട്സിൽ ഫാസ്റ്റ്‌ ഡാൻ ബ്ലാക്ക്‌ ബെൽറ്റ്‌ കരസ്ഥമാക്കിയ ആർതർ പ്രധാന കഥാപാത്രത്തെ അവതരിപ്പിക്കുന്ന മൾട്ടിലിംഗ്വൽ ചിത്രം ‘ദ ഗ്രേറ്റ്‌ എസ്കേപ്‌’ ഷൂട്ടിംഗ് പുരോഗമിക്കുകയാണ് . സൗത്ത്‌ ഇൻഡ്യൻ, യു എസ്‌ ഭാഷകളിലാണ് ചിത്രം പ്രക്ഷകരുടെ മുന്നിൽ എത്തുന്നത്. ആക്ഷൻ ഡ്രാമയായൊരുങ്ങുന്ന ഈ ചിത്രത്തിലേയ്ക്ക്‌ ഓഡീഷനിലൂടെയാണ്‌ ആർതർ തെരഞ്ഞെടുക്കപ്പെട്ടത്‌.
6 അടി നാലിഞ്ച്‌ ഉയരമുള്ള ആർതറിന്റെ പ്രകടനത്തേക്കുറിച്ച്‌ റോബർട്ട് പഹ്‌റാം ഏറെ മികച്ച അഭിപ്രായമാണ്‌ പ്രകടിപ്പിച്ചത്‌. കിക്ക് ബോക്സിങിൽ അഞ്ചു തവണ ലോകചാമ്പ്യനും, നാല് തവണ സ്പോർട്ട്-കരാട്ടെ ചാമ്പ്യനുമായ റോബർട്ട് പർഹാം, അമേരിക്കയിലെ തിരക്കേറിയ നടനും സംവിധായകനും എഴുത്തുകാരനും നിർമ്മാതാവും കൂടെയാണ്.
2013 ൽ ഇടുക്കി ഗോൾഡിൽ ഒരു ചെറിയ കഥാപാത്രത്തെ ആർതർ അവതരിപ്പിച്ചിരുന്നു. 16 കാരനായ ആർതറിനെ തേടി നിരവധി അവസരങ്ങൾ തേടിയെത്താറുണ്ടെങ്കിലും, വിദ്യാഭ്യാസം മുടങ്ങരുത്‌ എന്ന കാരണത്താൽ സിനിമാ പ്രവേശനത്തോട്‌ ബാബു ആന്റണി താത്പര്യക്കുറവ്‌ കാണിച്ചിരുന്നു. യു എസിൽ ഷൂട്ട്‌ നടക്കുന്നതിനാലും മകൻ്റെ വിദ്യാഭാസത്തിന് തടസങ്ങൾ ഇല്ലാത്തതിനാലും അഭിനയത്തിൽ ഒരു എക്സ്പീരിയൻസ് ലഭിക്കാനാണ് ബാബു ആന്റണി ‘ദ ഗ്രേറ്റ്‌ എസ്കേപി’ൽ മകനെ അഭിനയിപ്പിക്കാൻ തീരുമാനിച്ചത്. ഇതൊരു സോഫ്റ്റ് ലോഞ്ചിംഗ് മാത്രമാണെന്നും മികച്ച കഥാപാത്രങ്ങളും തിരക്കഥയും ലഭിച്ചാൽ ആർതറിൻ്റെ നായകനായുള്ള മികച്ച ലോഞ്ചിംഗ് പ്രതീക്ഷിക്കാമെന്നും ആക്ഷൻ കിങ് ബാബു ആൻ്റണി അറിയിച്ചു.
