മസ്കറ്റ് : മസ്കറ്റ് ഇന്ത്യന്‍ മീഡിയ ഫോറം ഓണാഘോഷങ്ങളുടെ ഭാഗമായി മോഡേണ്‍ എക്‌സ്‌ചേഞ്ചുമായി സഹകരിച്ച് പൂക്കള മത്സരം സംഘടിപ്പിക്കുന്നു. ഈ മാസം 26ന് രാവിലെ ഒമ്പത് മണി മുതല്‍ 11.30 വരെ വാദി കബീര്‍ ഗോള്‍ഡന്‍ ഒയാസിസ് ഹാളില്‍ മത്സരം അരങ്ങേറും. വിജയികള്‍ക്ക് ആകര്‍ഷകമായ സമ്മാനങ്ങള്‍ ഒരുക്കിയിട്ടുണ്ടെന്നും ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു. ആദ്യം രജിസ്റ്റര്‍ ചെയ്യുന്ന 25 ഗ്രൂപ്പുകള്‍ക്കാണ് മത്സരത്തില്‍ പങ്കെടുക്കാന്‍ അവസരം ലഭിക്കുക. പങ്കെടുക്കുന്നവര്‍ ആഗസ്ത് 23ന് മുമ്പ് രജിസ്‌ട്രേഷന്‍ പൂര്‍ത്തിയാക്കണം..ആദ്യ മൂന്ന് സ്ഥാനക്കാര്‍ക്ക് ക്യാഷ് പ്രൈസും തുടര്‍ന്നുള്ള മൂന്ന് ടീമുകള്‍ക്ക് പ്രോത്സാഹന സമ്മാനങ്ങളും പങ്കെടുക്കുന്ന മുഴുവന്‍ ടീമുകള്‍ക്കും സര്‍ട്ടിഫിക്കറ്റുകളും സമ്മാനിക്കും. ഓണാഘോഷം പ്രവാസ ലോകത്ത് വിപുലമായി കൊണ്ടാടുമ്പോള്‍ ഓണത്തിന്റെ വലിയ പ്രത്യേകതകൡ ഒന്നായ പൂക്കളം ഒരുക്കി മത്സരം സംഘടിപ്പിക്കാന്‍ സാധിക്കുന്നതില്‍ സന്തോഷമുണ്ടെന്നും ഓണത്തിന്റെ സ്‌നേഹ സന്ദേശം ഇതുവഴി കൈമാറാന്‍ സാധിക്കുമെന്നും ഇന്ത്യന്‍ മീഡിയ ഫോറം ഭാരവാഹികള്‍ പറഞ്ഞു. മലയാളിയുടെ ദേശീയ ഉത്സവമായ ഓണത്തിന് ഇന്ത്യന്‍ മീഡിയ ഫോറവുമായി ചേര്‍ന്ന് പൂക്കള മത്സരം ഒരുക്കാന്‍ സാധിക്കുന്നത് മോഡേണ്‍ എക്‌സ്‌ചേഞ്ചിന് അഭിമാനകരമാണെന്ന് മോഡേണ്‍ എക്‌സ്‌ചേഞ്ച് ജനറല്‍ മാനേജര്‍ ലിജു ജോണ്‍ പറഞ്ഞു. ഇന്ത്യന്‍ മീഡിയ ഫോറം പ്രസിഡന്റ് കബീര്‍ യൂസുഫ്, ജനറല്‍ സെക്രട്ടറി ജയകുമാര്‍ വള്ളിക്കാവ്, ട്രഷറര്‍ കെ അബ്ബാദ് ചെറൂപ്പ, കോര്‍ഡിനേറ്റര്‍ ഇഖ്ബാല്‍, മോഡേണ്‍ എക്‌സ്‌ചേഞ്ച് ജനറല്‍ മാനേജര്‍ ലിജു ജോണ്‍ എന്നിവര്‍ വാര്‍ത്താ സമ്മേളനത്തില്‍ പങ്കെടുത്തു… ബന്ധപ്പെടേണ്ട ഫോൺ നമ്പർ : 91798002
