യു എ ഇ : ദുബായ് ക്രീക്ക് മേഖലയില്‍ നാളെ രക്ഷാപ്രവര്‍ത്തന അഭ്യാസം നടത്തുമെന്ന് ദുബായിലെ ജനറല്‍ ഡയറക്ടറേറ്റ് ഓഫ് സിവില്‍ ഡിഫന്‍സ് അറിയിച്ചു. ഓഗസ്ത് 10 ബുധനാഴ്ച രാവിലെ 8 മുതല്‍ ഉച്ചയ്ക്ക് 12 വരെ 4 മണിക്കൂറാണ് അഭ്യാസം നടത്തുക. അഭ്യാസം കാരണം പുക ഉണ്ടാകാമെന്നും സുരക്ഷാ കാരണങ്ങളാല്‍ പരിസര പ്രദേശങ്ങളിലുള്ളവര്‍ സൈറ്റില്‍ നിന്ന് മാറി നില്‍ക്കണമെന്നും അതോറിറ്റി മുന്നറിയിപ്പ് നല്‍കി. അഭ്യാസത്തിന്റെ ഫോട്ടോകള്‍ എടുക്കരുതെന്നും സ്ഥലത്തിന് ചുറ്റുമായി വരരുതെന്നും അധികൃതർ ആളുകൾക്ക് മുന്നറിയിപ്പ് നൽകിയിട്ടുണ്ട്.
