അബുദാബി: യുഎഇയില്‍ മൂന്ന് പുതിയ ട്രാഫിക് ഫൈനുകള്‍ പ്രഖ്യാപിച്ചു. വിവിധ നിയമലംഘനങ്ങള്‍ക്ക് രണ്ടായിരം ദിര്‍ഹം വരെ പിഴ ഈടാക്കുമെന്നാണ് അധികൃതർ മുന്നറിയിപ്പ് നൽകിയിരിക്കുന്നത് . മഴയുള്ള കാലാവസ്ഥയിൽ താഴ്‍വരകള്‍ക്ക് സമീപവും വെള്ളപ്പൊക്കമുണ്ടാവുന്ന മറ്റ് സ്ഥലങ്ങള്‍ക്ക് അടുത്തും ഡാമുകളുടെ പരിസരങ്ങളിലും കൂട്ടംകൂടുന്നതിന് ആയിരം ദിര്‍ഹം പിഴ ഈടാക്കും ഒപ്പം ഡ്രൈവിങ് ലൈസന്‍സില്‍ ആറ് ബ്ലാക്ക് പോയിന്റുകളും പിഴയായി നൽകും . വെള്ളപ്പൊക്കമുള്ള താഴ്‍വരകളിലെ അപകട സാധ്യത കണക്കിലെടുത്തു അവിടെ പ്രവേശിച്ചാൽ രണ്ടായിരം ദിര്‍ഹം പിഴ ചുമത്തും. ഇത്തരത്തില്‍ പ്രവൃത്തിക്കുന്നവര്‍ക്ക് ഡ്രൈവിങ് ലൈസന്‍സില്‍ 23 ബ്ലാക്ക് പോയിന്റുകളാണ് ലഭിക്കുന്നത്. ഇതിന് പുറമെ നിയമലംഘനത്തിന് ഉപയോഗിച്ച വാഹനം 60 ദിവസം കസ്റ്റഡിയിലെടുത്ത് സൂക്ഷിക്കുമെന്നും അധികൃതർ വ്യക്തമാക്കി . ട്രാഫിക് പോലീസ് ഉദ്യോഗസ്ഥരുടെ പ്രവര്‍ത്തനം തടസപ്പെടുത്തുക, ആംബുലന്‍സുകളുടെയോ അത്യാഹിത സാഹചര്യങ്ങളിലും ദുരന്ത സമയങ്ങളിലും മറ്റ് പ്രതിസന്ധി ഘട്ടങ്ങളിലും മഴയുള്ള സമയത്തും രക്ഷാപ്രവര്‍ത്തനത്തില്‍ ഏര്‍പ്പെടുന്ന വാഹനങ്ങള്‍ക്ക് തടസം സൃഷ്ടിക്കുന്നവർക്കു ആയിരം ദിര്‍ഹം പിഴ ചുമത്തുകയും നാല് ബ്ലാക്ക് പോയിന്റുകള്‍ ലഭിക്കുകയും ചെയ്യും. ഇതിനു പുറമെ ഇവരുടെ വാഹനങ്ങള്‍ 60 ദിവസം കസ്റ്റഡിയില്‍ പിടിച്ചുവെക്കാനും നിയമം അനുശാസിക്കുന്നു . അടിയന്തിര സാഹചര്യങ്ങളിലും, അത്യാഹിതങ്ങളോ പ്രകൃതി ദുരന്തങ്ങളോ കാലാവസ്ഥ പ്രതികൂലമാവുന്ന സാഹചര്യങ്ങളിലോ ഡ്രൈവര്‍മാര്‍ പൂര്‍ണമായും ഗതാഗത നിയമങ്ങള്‍ പാലിക്കുന്നുണ്ടെന്ന് ഉറപ്പുവരുത്താനും സുരക്ഷ ഉറപ്പാക്കുമാണ് പുതിയ നിയമത്തിലുടെ ലക്ഷ്യമിടുന്നത്.
