മനാമ :സോപാനംവാദ്യകലാസംഘവും കോൺവെക്സ് ഇവന്റും സംയുക്തമായി സംഘടിപ്പിക്കുന്ന സോപാനം വാദ്യസംഗമം 2023 ഒക്ടോബർ 6 നു വൈകിട്ട്‌ 4 മണി മുതൽ ടുബ്ലി അദാരി പാർക്ക്‌ ഗ്രൗണ്ടിൽ വെച്ച് നടക്കുമെന്ന് അധികൃതർ അറിയിച്ചു.ഇന്ത്യയുടെ വിവിധ സംസ്ഥാനങ്ങളിൽ നിന്നുള്ള പരമ്പരാഗത കലാരൂപങ്ങളും വാദ്യസംഗമത്തിൽ അരങ്ങേറൂന്നു എന്നതും ഈ വർഷത്തെ വാദ്യസംഗമത്തിന്റെ പ്രത്യേകതയാണ്‌. ഒക്ടോബർ 6 നു വൈകിട്ട്‌ ഉത്ഘാടന സമ്മേളനം ആരംഭിക്കും, തുടർന്ന് ലോകപ്രശസ്ത സോപാനസംഗീതഞ്ജൻ സോപാനരത്നം അമ്പലപ്പുഴ വിജയകുമാറിന്റെ നേതൃത്വത്തിൽ നാൽപ്പത് കലാകാരന്മാരും കലാകാരികളും കേരളീയ തനതു സംഗീത പദ്ധതിയായ സോപാനസംഗീതം അരങ്ങേറും, തുടർന്ന് കേരള സംഗീതനാടക അക്കാദമി ചെയർമാൻ പത്മശ്രീ മട്ടന്നൂർ ശങ്കരങ്കുട്ടി മാരാരുടെ പ്രമാണത്തിൽ ഇരുനൂറിൽ പരം വാദ്യകലാകാരന്മാർ പങ്കെടുക്കുന്ന പഞ്ചാരി മേളവും ഉണ്ടാകും.ലോകപ്രശസ്ത മ്യൂസിക് വാദ്യകലാ ബാൻഡ്‌ ആയ ത്രികായ അവതരിപ്പിക്കുന്ന പ്രത്യേക വാദ്യസംഗീത സമന്വയം പരിപാടിയിൽ കേരളത്തിലെ പ്രഗത്ഭരായ വാദ്യസംഗീത കലാകാരന്മാരും പരിപാടിയിൽ പ്രസിദ്ധ മലയാള ചലച്ചിത്ര സംഗീത സംവിധായകൻ ശ്രീ ശരതും പങ്കെടുക്കും. അദാരിപാർക്ക്‌ ഗ്രൗണ്ടിൽ അരങ്ങേറുന്ന പരിപാടികൾക്കായി അതിവിപുലമായ സംവിധാനങ്ങളാണു സജ്ജീകരിക്കുന്നത്‌ എന്നും ഭാരവാഹികൾ വ്യക്തമാക്കി.ടുബ്ലി അദാരി പാർക്ക്‌ ഗ്രൗണ്ടിൽ നടക്കുന്ന പരിപാടി ആസ്വദിക്കുന്നതിന് ഫീസോ എൻട്രി പാസോ ഉണ്ടായിരിക്കുകയില്ല . പ്രവേശനം ഏവർക്കൂം സൗജന്യം ആയിരിക്കും.
കോൺവെക്സ് മീഡിയ MD അജിത്ത് നായർ, സോപാനം രക്ഷാധികാരി അനിൽ മാരാർ, വാദ്യസംഗമം ചെയർമാൻ ചന്ദ്രശേഖരൻ, ട്രഷറർ രാജേഷ് മാധവൻ, സാമ്പത്തിക കമ്മിറ്റി ചെയർമാൻ ശശികുമാർ, സോപാനം മീഡിയ കോഡിനേറ്റർ മനുമോഹനൻ, സോപാനം കോഡിനേറ്റർ വിനീഷ് സോപാനം എന്നിവർ
വാർത്താസമ്മേളനത്തിൽ പങ്കെടുത്തു.
