മനാമ:കഴിഞ്ഞ 20 വർഷത്തെ പ്രവാസ ജീവിതം അവസാനിപ്പിച്ച് നാട്ടിലേക്ക് മടങ്ങുന്ന കോട്ടയം പ്രവാസി ഫോറം സെക്രട്ടറി സോണി തോമസിന് കെപിഎഫ് എക്സിക്യൂട്ടീവ് കമ്മിറ്റിയുടെ നേതൃത്വത്തിൽ യാത്രയയപ്പ് നൽകി. പ്രസിഡന്റ്‌ ബോബി പാറയിൽ അദ്ധ്യക്ഷത വഹിച്ചു. കോട്ടയം പ്രവാസി ഫോറത്തിന്റെ വളർച്ചയിൽ, പ്രത്യേകിച്ച് കഴിഞ്ഞ 5 വർഷക്കാലം എക്സിക്യൂട്ടീവ് കമ്മിറ്റി അംഗമായിരുന്നുകൊണ്ടുള്ള അദ്ദേഹത്തിന്റെ പ്രവർത്തങ്ങൾക്ക് പ്രസിഡന്റ്‌ നന്ദി പറഞ്ഞു. എല്ലാവരോടും സ്നേഹത്തോടെയുള്ള സോണിച്ചേട്ടന്റെ പെരുമാറ്റം മീറ്റിംഗിൽ പങ്കെടുത്തവർ പ്രത്യേകം പരാമർശിച്ചു. നാട്ടിൽ സ്വന്തം കുടുംബത്തോടൊപ്പം ആയുരാരോഗ്യത്തോടെയുള്ള ഒരു വിശ്രമ ജീവിതം നയിക്കുവാൻ സാധിക്കട്ടെയെന്ന് ജനറൽ സെക്രട്ടറി ഷിബു എബ്രഹാം ആശംസിച്ചു. ഷിനോയ് പുളിക്കൽ, ബിനു നടുക്കേൽ, സിജു പുന്നവേലി, സോജി മാത്യു, സാജിദ് വേട്ടമല, സിബി ചെമ്പന്നൂർ, ജെയിംസ്, അജീഷ് തോമസ്, ജോയൽ ജോൺ, അജിത് സോണി എന്നിവർ ആശംസകൾ നേർന്നു.കെപിഎഫിന്റെ സ്നേഹോപഹാരമായി മൊമെന്റോ സമ്മാനിച്ചു. സോണി തോമസിന്റെ മറുപടി പ്രസംഗത്തിൽ തന്നോട് എല്ലാവരും കാണിച്ച സ്നേഹത്തിന് അദ്ദേഹം നന്ദി പറയുകയും, കോട്ടയം പ്രവാസി ഫോറത്തിന്റെ മുൻപോട്ടുള്ള പ്രവർത്തനങ്ങൾക്ക് ആശംസകൾ നേരുകയും ചെയ്തു.
