മനാമ: ഗള്‍ഫ് മേഖലയിലെ ആദ്യ ബിറ്റ്കോയിന് നിക്ഷേപക പദ്ധതിയുമായി ബഹ്റൈന്. എആര്‍പി ഡിജിറ്റലുമായി സഹകരിച്ചാണ് നാഷണല്‍ ബാങ്ക് ഓഫ് ബഹ്റൈന് ഘടനാപരമായ ബിറ്റ്കോയിന് നിക്ഷേപം ആരംഭിച്ചിരിക്കുന്നത്. ‘ഫ്യൂച്ചര്‍ ഓഫ് ഫിനാന്‍ഷ്യല്‍ ടെക്‌നോളജി 2024’ ഫോറത്തിനൊപ്പം നടന്ന ഒരു പ്രത്യേക ചടങ്ങിലായിരുന്നു ഇതുമായി ബന്ധപ്പെട്ട പ്രഖ്യാപനം. ഈ ഉല്‍പ്പന്നം അംഗീകൃത നിക്ഷേപകര്‍ക്ക് മാത്രമായി രൂപകല്‍പ്പന ചെയ്തിരിക്കുന്നതായി അധികൃതര്‍ അറിയിച്ചു. മൂലധന സംരക്ഷണം ഉറപ്പാക്കിക്കൊണ്ട് ബിറ്റ്കോയിന്റെ ദീര്‍ഘകാല വളര്‍ച്ച ഉപയോഗപ്പെടുത്താനുള്ള അവസരം ഇത് നിക്ഷേപകര്‍ക്ക് നല്‍കും.
ഘടനാപരമായ നിക്ഷേപത്തിലൂടെ, നിക്ഷേപകര്‍ക്ക് 100 ശതമാനം മൂലധന പരിരക്ഷയോടെ ബിറ്റ്കോയിന്റെ വര്‍ദ്ധിച്ചുവരുന്ന പ്രകടനത്തില്‍ നിന്ന് പ്രയോജനം നേടാം. ഇത് ക്രിപ്റ്റോകറന്‍സി വിപണിയുടെ ചാഞ്ചാട്ടത്തിനെതിരെ ശക്തമായ സംരക്ഷണം നല്‍കുന്നു. ഈ നിക്ഷേപം ഡിജിറ്റല്‍ ആസ്തികള്‍ക്കായുള്ള ആഗ്രഹവും മൂലധന സംരക്ഷണത്തിന്‍റെ ഉറപ്പും സമന്വയിപ്പിക്കുന്നുവെന്ന് നാഷണല്‍ ബാങ്ക് ഓഫ് ബഹ്റൈന് മാര്‍ക്കറ്റ്സ് ആന്‍ഡ് ബാങ്കിങ് സൊല്യൂഷന്‍സ് ഗ്രൂപ്പ് സിഇഒ ഹിഷാം അല്‍ കുര്‍ദി പറഞ്ഞു.വെല്‍ത്ത് മാനേജ്മെന്‍റ് ക്ലയന്‍റുകള്‍ക്ക് സുരക്ഷിതവും നൂതനവുമായ വഴികള്‍ നല്‍കാനുള്ള ബാങ്കിന്‍റെ പ്രതിബദ്ധതയാണ് ഈ ഉല്‍പ്പന്നം പ്രതിഫലിപ്പിക്കുന്നതെന്നും അദ്ദേഹം വ്യക്തമാക്കി. വികസിച്ചുകൊണ്ടിരിക്കുന്ന നിക്ഷേപ മേഖലകളില്‍ ഉപഭോക്താക്കളുടെ പോര്‍ട്ട്ഫോളിയോകള്‍ വൈവിധ്യവത്കരിക്കാന്‍ ഇത് അവരെ പ്രാപ്തരാക്കുന്നു. അപകടസാധ്യത കുറയ്ക്കുന്നതിനൊപ്പം വളര്‍ച്ചാ സാധ്യതകളെ സന്തുലിതമാക്കുന്ന അനുയോജ്യമായ പരിഹാരങ്ങള്‍ നല്‍കുന്നതിലൂടെ, ഈ ഉല്‍പ്പന്നം അപകടസാധ്യത കുറഞ്ഞതാണ് എന്നത് നിക്ഷേപകരെ ആകര്‍ഷിക്കുന്ന പ്രധാന ഘടകമാണെന്നും അദ്ദേഹം പറഞ്ഞു.
ബഹ്റൈന് നാഷനല്‍ ബാങ്കുമായുള്ള പങ്കാളിത്തം പ്രാദേശിക വിപണിയില്‍ ഒരു വഴിത്തിരിവാണെന്ന് എആര്‍പി ഡിജിറ്റലിന്‍റെ സഹസ്ഥാപകനും കോ-സിഇഒയുമായ അബ്ദുല്ല കാനൂ പറഞ്ഞു . ഡിജിറ്റല്‍ അസറ്റുകളിലെ ഞങ്ങളുടെ വൈദഗ്ധ്യവും സാമ്പത്തിക മേഖലയിലെ എന്‍ബിബിയുടെ വിപുലമായ സാന്നിധ്യവും ഉപയോഗിച്ച്, സുരക്ഷിതമായ ചട്ടക്കൂടിനുള്ളില്‍ ബിറ്റ്‌കോയിനിലേക്കുള്ള പ്രവേശനം സുഗമമാക്കുന്ന ഒരു ഉല്‍പ്പന്നമാണ് ഇതിലൂടെ തങ്ങള്‍ വികസിപ്പിച്ചെടുത്തിരിക്കുന്നതെന്നും അദ്ദേഹം പറഞ്ഞു.ഈ ഘടനാപരമായ നിക്ഷേപം ഡിജിറ്റല്‍ ആസ്തികളില്‍ സുരക്ഷിത മാര്‍ഗം സ്വീകരിക്കാന്‍ ആഗ്രഹിക്കുന്ന നിക്ഷേപകര്‍ക്ക് പുതിയ അവസരങ്ങള്‍ തുറക്കും. പുതിയ ബിറ്റ്കോയിന് നിക്ഷേപക പദ്ധതി സാമ്പത്തിക സാങ്കേതിക വിദ്യയുടെ ഒരു പ്രമുഖ പ്രാദേശിക കേന്ദ്രമായും പ്രാദേശിക, ആഗോള നിക്ഷേപകര്‍ക്ക് വിശ്വസനീയമായ നിക്ഷേപ കേന്ദ്രമായുമുള്ള ബഹ്റൈന്റെ സ്ഥാനം ശക്തിപ്പെടുത്തുമെന്നാണ് ഈ മേഖലയില്‍ പ്രവര്‍ത്തിക്കുന്നവരുടെ വിലിയിരുത്തല്‍.
2019 സെന്‍ട്രല്‍ ബാങ്ക് ഓഫ് ബഹ്റൈന് ക്രിപ്റ്റോ നിയന്ത്രണത്തിനായി നിയമം കൊണ്ടുവന്നിരുന്നു. അതേവർഷം ബഹ്റൈനില്‍ ക്രിപ്റ്റോ അസറ്റ് സര്‍വീസ് പ്രൊവൈഡറായി പ്രവര്‍ത്തിക്കാനുള്ള ലൈസന്‍സ് നേടിയ ആദ്യത്തെ കമ്പനിയായി റെയിന്‍ ഫിനാന്‍ഷ്യല്‍ മാറി. അതിനുശേഷം, കോയിന്‍മെന, ബിറ്റ്ഒയാസിസ് എന്നിവയുള്‍പ്പെടെയുള്ള മറ്റ് ഓപ്പറേറ്റര്‍മാര്‍ക്കും ലൈസന്‍സ് നല്‍കി. 2022 മാര്‍ച്ചില്‍, ആഗോള ക്രിപ്റ്റോ എക്സ്ചേഞ്ച് പ്ലാറ്റ്ഫോമായ ബിനാന്‍സിന് ബാങ്കിന്‍റെ ലൈസന്‍സ് ലഭിച്ചു. കഴിഞ്ഞ മാസം, ക്രിപ്റ്റോ ഡോട്ട്‌കോമിന് രാജ്യത്ത് പ്രവര്‍ത്തിക്കാനുള്ള ലൈസന്‍സും ലഭിച്ചിരുന്നു.
