മനാമ:ബഹ്‌റൈന്‍ കേരളീയ സമാജവും ഡി സി ബുക്‌സും സംയുക്തമായി സംഘടിപ്പിക്കുന്ന അന്താരാഷ്ട്ര പുസ്തകോത്സവത്തിനോടനുബന്ധിച്ച് മലയാളി എഞ്ചിനീയറിംഗ് പ്രൊഫഷണലുകളെ പങ്കെടുപ്പിച്ച് ഈ വരുന്ന നവംബര്‍ പത്തിന് “കേരളാ എഞ്ചിനീയേഴ്സ് മീറ്റ്‌” സംഘടിപ്പിക്കുന്നു.ബഹ്‌റൈന്‍ കേരളീയ സമാജം കീന്‍ ഫോറുമായി സഹകരിച്ച് സംഘടിപ്പിക്കുന്ന എഞ്ചിനീയേഴ്സ് മീറ്റില്‍ വിശിഷ്ട അതിഥിയായി ഐക്യ രാഷ്ട്രസഭ പരിസ്ഥിതി പ്രോഗ്രാം ദുരന്ത അപകടസാധ്യതാ ലഘൂകരണ വിഭാഗത്തിന്റെ തലവനും അന്താരാഷ്ട്രതലത്തില്‍ പ്രശസ്തനായ ടെക്നോളജി വിദഗ്ധനുമായ ശ്രീ: മുരളി തുമ്മാരുകുടി പങ്കെടുക്കും. തുടര്‍ന്ന്‍ എഞ്ചിനീയറിംഗ് മേഖലയിലെ പുതിയ പ്രവണതകളും വെല്ലുവിളികളും എന്ന വിഷയത്തില്‍ അദ്ദേഹത്തിന്‍റെ പ്രഭാഷണവും ഉണ്ടായിരിക്കും.നവംബർ 10 വെള്ളിയാഴ്ച വൈകുന്നേരം 5 മണിയ്ക്ക് ബഹ്റൈൻ കേരളീയ സമാജം ഡി ജെ ഹാളില്‍ നടക്കുന്ന എഞ്ചിനീയറിംഗ് പ്രൊഫഷണലുകളുടെ ഈ സംഗമം പ്രവാസലോകത്ത്‌ ഇത്തരത്തില്‍ നടക്കുന്ന ഏറ്റവും വലിയ പരിപാടിയായിരിക്കുമെന്ന് ബഹ്റൈൻ കേരളീയ സമാജം പ്രസിഡന്റ് ശ്രീ പി വി രാധാകൃഷ്ണപിള്ളയും സെക്രട്ടറി ശ്രീ വർഗീസ് കാരയ്ക്കലും സാഹിത്യ വിഭാഗം സെക്രട്ടറി ശ്രീ ഫിറോസ് തിരുവത്രയും വാർത്താക്കുറിപ്പിൽ അറിയിച്ചു. . ഐ ഐ ടി കാൻപൂർ യൂണിവേഴ്സിറ്റി ഓഫ് കാലിഫോർണിയ,, ഇന്റർനാഷണൽ ലീഡർഷിപ്പ് അക്കാദമി ( ഐക്യരാഷ്ട്ര സഭാ സർവകലാശാല) തുടങ്ങിയ പ്രശസ്ത സ്ഥാപനങ്ങളില്‍ പ്രൊഫഷണല്‍ വിദ്യാഭാസം പൂര്‍ത്തിയാക്കിയ ശ്രീ മുരളി തുമ്മാരുകുടിയുമായി നേരിട്ട് സംവദിക്കാനുള്ള ഈ അസുലഭ അവസരം മലയാളി എഞ്ചിനീയറിംഗ് സമൂഹം പ്രയോജനപ്പെടുത്തണമെന്നും സംഘാടകര്‍ അഭ്യര്‍ത്ഥിച്ചു. ഈ പരിപാടിയില്‍ പങ്കെടുക്കാന്‍ ആഗ്രഹിക്കുന്നവര്‍ താഴെപ്പറയുന്ന നമ്പറുകളില്‍ ബന്ധപ്പെടാവുന്നതാണ്.മുരളികൃഷ്ണൻ 3411 7864,വിനൂപ് കുമാർ 973 3925 2456,പ്രശാന്ത് മുരളീധരൻ 973 3335 5109,ശ്രീജിത്ത് എ നായർ 973 3650 4927
