അബുദബി: യുഎഇയിൽ ഇന്ത്യന്‍ കോണ്‍സല്‍ ജനറല്‍ ആയി സതീഷ് കുമാര്‍ ശിവന്‍ അധികാരമേറ്റു. കോണ്‍സല്‍ ജനറല്‍ ഓഫീസിലെ ഉദ്യോഗസ്ഥരുടെ നേതൃത്വത്തില്‍ അദ്ദേഹത്തെ സ്വീകരിച്ചു. പുതിയ ഉത്തരവാദിത്തം ഏറ്റെടുത്തതിന് പിന്നാലെ ഓഫീസ് പരിസരത്ത് സ്ഥാപിച്ചിട്ടുള്ള മഹാത്മാഗാന്ധിയുടെ പ്രതിമയില്‍ പുഷ്പാര്‍ച്ചന നടത്തി.2005 ബാച്ച് ഇന്ത്യന്‍ ഫോറിന്‍ സര്‍വീസ് ഉദ്യോഗസ്ഥനാണ് സതീഷ് കുമാര്‍ ശിവന്‍. ഇന്ത്യന്‍ വിദേശകാര്യ മന്ത്രാലയത്തില്‍ ഡല്‍ഹിയില്‍ മൂന്ന് വര്‍ഷത്തിലേറെ പ്രവര്‍ത്തിച്ചിട്ടുണ്ട്. ദക്ഷിണ കൊറിയയിലെ സിയോളിലെ ഇന്ത്യന്‍ എംബസിയില്‍ ഡെപ്യൂട്ടി ചീഫ് ഓഫ് മിഷനായും അമേരിക്കയിലെ ഇന്ത്യന്‍ എംബസിയില്‍ ഫസ്റ്റ് സെക്രട്ടറിയായും അദ്ദേഹം സേവനമനുഷ്ഠിച്ചിട്ടുണ്ട്. 2020 ജൂലൈ മുതൽ ദുബായിലും നോർത്തേൺ എമിറേറ്റ്‌സിലും ഇന്ത്യൻ കോൺസൽ ജനറലായിരുന്ന ഡോ അമൻ പുരി സ്ഥാനം ഒഴിഞ്ഞതിനുപിന്നാലെയാണ് സതീഷ് കുമാര്‍ ശിവന്‍ ചുമതലയേറ്റത്.
