മസ്കറ്റ്: ഒമാനിൽ ഡ്രൈവിങ് ലൈസൻസുകൾ ഇനി ഓൺലൈനിൽ പുതുക്കാൻ കഴിയുമെന്ന് റോയൽ ഒമാൻ പൊലീസ് അറിയിച്ചു. ജൂലൈ 12 ഞായറാഴ്ച മുതൽ ഈ സംവിധാനം നിലവിൽ വരും. കാലാവധി കഴിഞ്ഞ ലൈസൻസുകൾ ആർ.ഒ.പി വെബ്സൈറ്റ് അല്ലെങ്കിൽ മൊബൈൽ ആപ്ലിക്കേഷൻ മുഖേന പുതുക്കാനാകുന്ന സംവിധാനമാണ് നിലവിൽ വരുക. ലൈസൻസ് ഓൺലൈനിൽ പുതുക്കണമെന്നുള്ളവർ ആദ്യം ഇലക്ട്രോണിക് സർട്ടിഫിക്കേഷൻ സർവീസ് (പി.കെ.ഐ) ആക്ടിവേറ്റ് ചെയ്യണം. കണ്ണ് പരിശോധനയുടെ ഫലവും ഓൺലൈനിൽ അപ്ലോഡ് ചെയ്യണം. പുതുക്കിയ ലൈസൻസുകൾ ഏറ്റവും അടുത്ത പൊലീസ് സ്റ്റേഷനിൽ നിന്ന് കൈപ്പറ്റാവുന്നതാണെന്നും റോയൽ ഒമാൻ പൊലീസ് അറിയിച്ചു.
