ഒമാൻ : കൈരളി മസ്ക്കറ്റ് ദാർസൈത്തിലെ ലുലു ഹൈപ്പർ മാർക്കറ്റുമായി സഹകരിച്ച് കുട്ടികൾക്കായി – Together in December എന്ന പേരിൽ ക്രിസ്തുമസ് ആഘോഷം സംഘടിപ്പിച്ചു.
ചിത്രരചന, കളറിംഗ് , സാന്റാ ഫാൻസി ഡ്രസ്സ് എന്നീ മത്സരങ്ങളായിരുന്നു പരിപാടിയുടെ മുഖ്യ ആകർഷണം.
കൈരളി മസ്ക്കറ്റ് ഏരിയ സെക്രട്ടറി ശ്രീ രജി ഷാഹുൽ സ്വാഗതം പറഞ്ഞ ചടങ്ങിൽ ഇന്ത്യൻ സ്ക്കൂൾ മസ്ക്കറ്റ് മുൻ കൺവീനറും ഇന്ത്യൻ സോഷ്യൽ ക്ലബ് കേരള വിംഗ് കോ-കൺവീനറും പ്രമുഖ സാമൂഹ്യ പ്രവർത്തകനുമായ ശ്രീ നിധീഷ് കുമാർ പരിപാടികൾ ഔപചാരികമായി ഉദ്ഘാടനം ചെയ്തു. കൈരളി ജനറൽ സെക്രട്ടറി ബാലകൃഷ്ണൻ, കേരളവിംഗ് കൺവീനർ ശ്രീ സന്തോഷ്കുമാർ, ലുലു ഹൈപ്പർ മാർക്കറ്റ് ദാർസൈറ്റ് ഫ്ലോർ മാനേജർ ശ്രീ റയാൻ എന്നിവർ പരിപാടികൾക്ക് ആശംസകൾ നേർന്നു. നിഹാരിക നിശാന്ത് പരിപാടിയുടെ അവതാരികയായിരുന്നു.
മത്സര പരിപാടികളിൽ 200ലധികം കുട്ടികൾ പങ്കെടുത്തു. വളരെ മികച്ച പ്രതികരണമാണ് കുട്ടികളിൽ നിന്നും രക്ഷിതാക്കളിൽ നിന്നും ലഭിച്ചത്.
പരിപാടിയിൽ പങ്കെടുത്ത മുഴുവൻ കുട്ടികൾക്കും സമ്മാനം നൽകാൻ സാധിച്ചത് കുട്ടികളിൽ വലിയ ആവേശം ഉണർത്തി. പരിപാടിക്ക് വേണ്ട സൗകര്യങ്ങൾ ഒരുക്കിയ ദാർസൈറ്റ് ലുലു ഹൈപ്പർമാർക്കറ്റ് മാനേജ്മെന്റിന്റെ സഹകരണവും പിന്തുണയും വളരെ വിലപ്പെട്ടതാണെന്നും അവർക്ക് പ്രത്യേകം നന്ദി അറിയിക്കുന്നതായും സംഘാടകർ വാർത്ത കുറിപ്പിൽ അറിയിച്ചു.
