മസ്കത്ത്: ഒമാനിൽ കാറും ട്രെയിലറും കൂട്ടിയിടിച്ച് മലയാളി മരിച്ചു. തിരുവനന്തപുരം വർക്കല സ്വദേശി തുഷാർ നടേശൻ(31) ആണ് മരിച്ചത്. മസ്കത്തിൽ നിന്ന് 200 കിലോമീറ്ററിലധികം ദൂരെ സൂറിനടുത്ത് ഞായറാഴ്ച രാവിലെ 11 മണിയോടെയായിരുന്നു അപകടം.അപകടത്തിൽ തുഷാർ ഒാടിച്ചിരുന്ന കാർ നിശേഷം തകർന്നു. സംഭവ സ്ഥലത്ത് വെച്ചുതന്നെ ഇദ്ദേഹം മരണപ്പെട്ടു. ടിഷ്യൂ പേപ്പർ നിർമാണ കമ്പനിയായ അൽ ലൂബ് പേപ്പർ ഫാക്ടറിയിലെ സെയിൽസ്മാനായിരുന്നു തുഷാർ. സൂറിൽ വിതരണത്തിന് ശേഷം തിരികെ മസ്കത്തിലേക്ക് മടങ്ങവേയായിരുന്നു അപകടം.
