കൊണ്ടോട്ടി- കരിപ്പൂർ വിമാനത്താവളത്തിൽ നിന്ന് ദോഹയിലേക്ക് കടത്താൻ ശ്രമിച്ച രണ്ടരകോടിയുടെ മയക്ക് മരുന്നുമായി യാത്രക്കാരൻ പിടിയിൽ. കണ്ണൂർ കോടാലി കുഞ്ഞിപ്പളളി മുല്ലവീട്ടിൽ ജാബിർ(26)ആണ് കേന്ദ്രസുരക്ഷാ സേനയുടെ പിടിയിലായത്.
ഖത്തർ എയർവെയ്‌സിന്റെ വിമാനത്തിൽ ദോഹയിലേക്ക് പോകാനെത്തിയ ജാബിറിന്റെ ഹാന്റ്ബാഗ് കേന്ദ്രസുരക്ഷ സേന എക്‌സ്‌റേ പരിശോധന നടത്തുന്നതിനിടയിൽ സംശയം തോന്നി പിടികൂടുകയായിരുന്നു. തുടർന്ന് ബാഗ് കസ്റ്റഡിയിലെടുത്ത് വിശദപരിശോധന നടത്തിയപ്പോഴാണ് ബാഗിൽ നിന്ന് വെളുത്ത പൊടി കണ്ടെത്തിയത്.
ബാഗിന്റെഅടിഭാഗത്തുണ്ടായിരുന്ന രഹസ്യഅറയിലാണ് ഇത് സൂക്ഷിച്ചിരുന്നത്.മെത്തോ ഫെറ്റാമിൻ ഇനത്തിൽ പെട്ട 530 ഗ്രാം മയക്കുമരുന്നാണ് കണ്ടെടുത്തത്.
ഇയാളെകൂടുതൽ ചോദ്യം ചെയ്യുന്നതിനായി കൊച്ചിയിൽ നിന്നെത്തിയ നാർക്കോട്ടിക് വിഭാഗത്തിന് കൈമാറി.പാർട്ടികളിലും മറ്റും ലഹരിക്കായി ഉപയോഗിക്കുന്നവയാണിത്. പിടികൂടിയ മയക്ക് മരുന്നിന് രണ്ടര കോടിയോളം വിലവരും.ജാബിറിനെ ചോദ്യം ചെയ്യുന്നത് വഴി കൂടുതൽ വിവരങ്ങൾ ലഭിക്കുമെന്നുളള പ്രതീക്ഷയിലാണ് അന്വേഷണ സംഘം.
